Matthew 16
Hetetamen Tei Keil Avis Iesu Voumon Merikel Avalesi a
1En avong tai, Farasi ka Satusi keil umai ven Iesu keke avasak visi. Sakini avisi voumon merikel tai avalesi vatie lati keke kei ka ven Ahi anatin.2Ka Iesu vit kesi min keil vit, “Navong meteiai munu, kami mivit, '?Kolesi? Teilang vilhili. Mul rie lati keke ean hetahos visuvong.' 3Ka navong out mulan, kami mivit, 'Kosa, ous hous veni teilang vilhili ka mahmah keil houlu.' Milei kilea en sakien ten ean keil, ka misakras mivalei kilea asa koa mul kur out en avong kosa. 4Kami meatin keil ten avong kosa, emivati mivales etai merikel keke mivakul anatin enau eni. Anatin, emivati mivalesi veni mikalkali ka milokovein Ahi suval ahin tai koa loh kovien meatin kati onen keke vamaen kei min meatin sav. Ka nirmumon etai merikel mihelesi, tanges varei mihelesi koa hehi merikel onen provet Siona.” Evus, Iesu lokovein keil, vut en vot ka va en out sav ral min onen keil.
Iesu Sel Kat Meatin Keil Onen Keke Ilei Kat Revi Keil ven 'Is' Onen Farasi ka Satusi Keil b
5Navong Iesu ka meatin keil onen arokol usi mari oai Kaleli, meatin keil onen amundem kati keke evobong avakur veret ae. 6Ka navong amual uva, Iesu viteni min keil vit, “Mihelei kat revi kami ven 'is' onen Farasi ka Satusi keil.”7Navong alonge, amul aviteni min keil eris avit, “Kei mul selus minir usil is veni rorkur etai veret vahi ar.”
8Ka Iesu long kilea asa amul aselus usili, sakini va vis keil vit, “!Demkatien onami havivi ramat! ?Vensa mimul miselus min kami usil veret koa tovuol? 9?!Mirkileatei veah!? ?Emivobongeni tuai keke navengan amo keil tousan elim (5000) en veret elim enges? ?Ka veiat ehis vilelau keke kami misieni? 10?Vuo mukave en avong navengan amo keil tousan ehat (4000) en veret oulu (7) enges? ?Veiat ehis vilelau mules koa kami misieni? 11?Sakini, vensa kami mirkileatei keke narselustei usil veret? Ka mihelei kat revi kami ven is onen Farasi ka Satusi keil.” 12Sakini akilea suk keke rovitentei keke avalei kat revi keil ven is ten veret, ka ven hihiseien keil onen Farasi ka Satusi keil koa romaltei.
Pita Vit Lati keke Iesu vi Kristo koa Ahi Vat Kati c
13Iesu ka meatin keil onen amual uva, akistal vesesal en taon ten out Seseria-Filipae. Ka en out enek, kei vis onen keil vit, “?Meatin keil aviteni keke inau, Natin Meatin, navi isei?”14Ka avit kesi mini avit, “Meatin tei avit kovi Sion Baptis. Ka teisav avit kovi provet Ilaetsa. Ka tateisav emun avit kovi provet Seremaea telamu vuo provet sav emun.”
15Ka kei vis keil vit, “?Ka mukave en kami? ?Mivit inau navi isei varei?”
16Ka Saemon Pita mea vit, “Keik kovi Kristo. Anatin, kovi Natin Ahi koa moul.”
17Ka Iesu viteni mini vit, “!Tokolkatien onen Ahi mul tuai enuk, Saemon natin Siona! Veni rovitei meatin keke vahothot enau minuk, ka Tata onak varei en out nesa mumoni. 18Ka naviteni minuk keke kovi 'Pita' koa aneite teni vi 'ahat'. Ka en ahat koanek, numon Sios onak hel ien. Ka keihoen vasi ten matien sakras vamai vapuruni. 19Nilingi en hem, ki keil ten hiasuvien onen Ahi. Sakini, asa koa koring koe en out netan, Ahi emun heting koe. Ka asa komaeni en out netan, Ahi emun hemaeni.” 20Evus, Iesu vit koe min onen keil keih anahitentei min etai meatin keke kei vi Kristo koa Ahi vat kati.
Iesu Selus Usil Mahien, Matien, ka Mearisien Onen ran Matien d
21En avong enek eva, Iesu vit kilea min meatin keil onen keke kei heha en out Serusalem. Ka navong itokol Serusalem, kei hekur mahien hehi houlu en hen elda keil, asuv keil onen pris keil, ka tiser keil ten Mengkatien onen Mosis. Kei vit meseni min keil keke uasi hemat, ka en avong hetel, kei hemoul eris ran matien.22Navong Iesu viteni mukok, Pita kur seheni havivi ka selus keih mini vit, “!Asuv, konaselustei namukonek! !Tounah enek sakras vakistal enuk!”
23Ka Iesu viles, les Pita ka viteni mini vit, “!Komusil rendemien onen Temat, kiha ranau! Komul kosak visi keke kovoumonau masavoi en sise onak veni komusil rendemien onen meatin keil ten out netan enges, ka kormusiltei rendemien onen Ahi.”
24Evus, Iesu viteni min meatin keil onen vit, “Munak meatin etai envati vousil nau, kei hesesein moulien onen, hehous aiveave onen, ka housil kat nau. 25Veni meatin koa envati vahuli kat moulien onen, moulien enek hevuol rani. Ka munak hemaen moulien onen hevuol venau, kei hehotin moulien koa vi anatin. 26?Asa tahos munak meatin tai kur tounah vasi ten out netan ka moulien onen mul vuol rani? !Tounah tovuol! Kei sakras vasan etai tounah keke vakur ris moulien onen.
27“Inau, Natin Meatin, nimai ris hetal min muohien koa Tata onak hesani minau ka hetal min angelo keil onen. Ka en avong koanek, nisan retai en ui umen min meatin vasi keil housil asa koa keil amumoni. 28Anatin eli naviteni min kami, tei en kami koa mimul mimulomal ekok kosa, mihermattei mau ka mihelesi navong inau, Natin Meatin, nimai hetal min keihoen ten hiasuvien onak.”
Copyright information for
PMA